خاص نمبر ”جیرال کا منصوبہ“ آپ کی خدمت میں پیش ہے، چونکہ یہ خاص نمبر ہے اور تقریباً دو گنا صفحات پر مشتمل ہے، اس لیے بھی میں آپ سے دو باتیں کی بجائے چار باتیں کروں گا، اگر آپ کو چار باتوں پر اعتراض ہے تو آپ اس کا نصف حصہ پڑھ لیں، اس پر مجھے کوئی اعتراض نہیں ہو گا۔
چار باتوں میں سب سے پہلی بات تو یہ ہے کہ خاص نمبر میں، میں اپنے ان تمام پڑھنے والوں کی خواہشات پوری کر رہا ہوں جو انسپکٹر جمشید اور انسپکٹر کامران مرزا کو ایک بار پھر ساتھ دیکھنا چاہتے تھے۔ نہ صرف انھیں بلکہ ان کے بچوں کو بھی، اور اس کے ساتھ ہی ان کی خواہش یہ بھی تھی کہ ان مقابلے میں جیرال اور کالی آنکھ ایک ساتھ آئیں۔
عام سائز کے ایک ناول میں ان سب کرداروں کو جمع کرنا اسے چوں چوں کا مربہ بنانا تھا۔ تو اگر میں آپ کی خدمت میں چوں چوں کا مربہ پیش کرتا تو آپ ناک منہ چڑھاتے اور مجھے طرح طرح کی سناتے ، دوسری الجھن یہ بھی تھی کہ اگر میں اسے دو یا تین حصوں میں تقسیم کر دیتا تو آپ کو درمیان میں ایک ماہ کا انتظار برداشت کرنا پڑتا اور آپ جھنجھلاتے ، مجھ پر تاؤ کھاتے، یہ بھی مجھے منظور نہیں کہ آپ مجھ پر تاؤ کھائیں ، تاؤ کھانا یوں بھی صحت کے لیے مضر ہے اور میں تو اپنے پڑھنے والوں کو صحت کے لحاظ سے قابلِ رشک دیکھنا پسند کرتا ہوں ، کیونکہ صحت مند لوگ ہی کامیاب زندگی گزارتے ہیں ، ملک اور قوم کے کام آسکتے ہیں۔
لہٰذا درمیانی راستہ یہ نکالا گیا کہ اس ناول کو ایک ہی ناول بنا کر شائع کر دیا جائے۔ اس طرح ناول دو گنا تو ضرور ہو جائے گا لیکن پڑھنے والے ہر قسم کی الجھن سے بچ جائیں گے۔
ہاں ایک الجھن قیمت کی ضرور باقی رہ جائے گی۔ سو شوق کی تو کوئی قیمت ہی نہیں ہوتی اور پھر تین ماہ پہلے ہی اعلان کر دینے کی صورت میں سب اسے خریدنے کی تیاری کر ہی چکے ہوں گے۔ اس طرح یہ ضخیم ناول آپ تک پہنچانے میں کامیاب ہو رہا ہوں۔ یہ آپ کی امیدوں اور خواہشات پر کس حد تک پورا اُترتا ہے، یہ آپ اپنے خطوط کے ذریعے مجھے بتائیں گے۔
لیجیے! شروع کی تھی پہلی بات اور پہلی بات میں، میں ساری باتیں بتا گیا، اس طرح چار باتیں کی بجائے ایک بات تک ہی معاملہ رہ گیا
خیر کوئی بات نہیں، زندہ رہا تو پھر کوئی خاص نمبر پیش کروں گا اور اس میں چار کی بجائے آٹھ باتیں کر لوں گا۔
”جیرال کا منصوبہ “ کے بارے میں آپ کے خطوط کا انتظار رہے گا۔