السلام علیکم

آج کی دور میں ناول شائع کرنا خالہ جی کا گھر نہیں۔

اب جتنا مشکل ناول شائع کرنا ہو گیا ہے اس سے کہیں زیادہ پڑھنے والوں کے لیے ناول خریدنا مشکل ہو گیا ہے۔۔۔ یہی وجہ ہے تسلسل بار بار ٹوٹ رہا ہے۔

فاروق صاحب کی کوشش ہوتی ہے کہ ہر ماہ باقاعدگی سے ناول وقت پر شائع کردیا جائے لیکن وہ اس ارادے کو پایہ تکمیل تک پہنچاتے پہنچاتے رہ جاتے ہیں۔۔۔

ادھر قارئین ناولوں کا انتظار کرتے کرتے رہ جاتے ہیں اور پھر ناول آتا ہے تو اس وقت تک بددل ہو چکے ہوتے ہیں۔ ادھر جب میں یہ حالت دیکھتا ہوں تو ہاتھ روک لیتا ہوں۔ جب میں ہاتھ روک لیتا ہوں تو فاروق صاحب کا فون آ جاتا ہے کہ یہ کیا کر رہے ہیں۔ ناول لکھتے رہیں۔ آپ کا کام لکھنا ہے آپ کام جاری رکھیں۔ شائع کرنا ہمارا کام ہے اور یہ کام ہمیں کرنا ہے ہم کریں گے۔

میں پھر کمر باندھ لیتا ہوں اور بچپن میں پڑھی ایک نظم ذہن میں دہرانے لگتا ہوں۔ اس کا ایک شعر آپ بھی سن لیں۔

اٹھ باندھ کمر، کیا ڈرتا ہے
پھر دیکھ خدا کیا کرتا ہے

آپ بھی کمر باندھ لیں۔ فاروق صاحب کو بھی یہی مشورہ ہے۔

رہ گیا میں۔ میں پہلے ہی کمر باندھے رہتا ہوں۔

ان دو باتیں میں اگر آپ کو مایوسی کی کوئی جھلک دکھائی دے تو آپ مایوس نہ ہو جائیے گا۔ کمر باندھے رکھیے گا۔ جی ہاں مجبوری ہے۔

لیجیے۔ ناول کی بات تو کی نہیں دوسری باتوں میں الجھ گیا۔

قتل کا خون آپ کے لیے ایک عجیب ناول ثابت ہو گا۔
ہوسکتا ہے کئی مقامات پر آپ یہ کہہ اٹھیں۔ بھلا یہ کیسے ممکن ہے۔ جب آپ غور کریں گے تو یہ باتیں ممکن نظر آئیں گی۔ جی ہاں اور کیا۔

بس اس سے زیادہ تو میں بھی کچھ بتانے کی پوزیشن میں نہیں۔

لہٰذا اجازت

والسلام